Archive for the category: Uncategorized @an

Aguesta iniciativa forme part deth projècte de cooperacion Interreg-POCTEFA “Reiaume der Aneto”, damb eth que se preten méter en valor es semblances istoriques e actuaus qu’an coma territòris vesins e des Pirenèus.

Eth passat diuendres s’amassèc eth Comité Tecnic entà contunhar era collaboracion intertermièra, laguens deth projècte Interreg-POCTEFA “Reiaume der Aneto”, en quau trabalhen amassa des dera passada legislatura.

En aguesta amassada, ena que tanben i participèren membres dera Fondacion Musèu Etnologic dera Val d’Aran, s’a encetat un nau projècte, damb era creacion d’ua exposicion itineranta entre es diuèrsi territòris, que s’amiarà a tèrme aguesta pròplèu primauera.

Aguesta exposicion anarà dirigida a remercar es elements qu’an en comun, en tot explicar es semblances istoriques, economiques e sociaus en tot evolucionar enquia aué dia. En aguest sens, era exposicion compdarà damb fòrça elements comuns: era situacion geografica (territòris des Pirenèus, en tot partir der Aneto), era istòria comuna a compdar dera Edad Mejana, es conflictes belics e era economia basada en sector primari e terciari.

Ei previst qu’aguesta exposicion itineranta comence en abriu en Benasque e seguisque en mes de mai en Vielha e Luchon, se ben encara manque per determinar eth calendari finau.

“Damb era creacion d’aguesta exposicion itineranta, çò que pretenem ei méter en valor es elements qu’auem en comun Vielha e Mijaran, Benasque e Luchon, coma territòris vesins e des Pirenèus”, comente eth dusau Tinent d’Alcalde e còsso de torisme de Vielha e Mijaran, Alberto López. E hig que “contunham apostant per ua collaboracion fòrça estrèta en projècte POCTEFA “Reiaume der Aneto”, entà poder projectar, amassa, es diuèrsi territòris que formam part d’aguest projècte”.

Ges a licitacion era contractacion des equipaments de besonh entà desvolopar e estructurar aguesta naua aufèrta toristica que s’enquadre laguens des accions de cooperacion transtermièra Interreg Poctefa “Reiaume der Aneto”

Vielha e Mijaran auance en projècte tà bastir era estacion de montanha e centre trail, en quau i aurà includit bona part deth territòri naturau deth municipi damb 130 quilomètres de rotes de trail running e 240 quilomètres d’itineraris d’esquí de montanha e raquetes de nhèu.

Eth Centre Trail e era Estacion de Montanha son ua des accions de cooperacion transtermièra Interreg-Poctefa “Reiaume der Aneto” que se compartís damb es municipis de Luchon e Benasc, damb er objectiu de interconnectar es territòris a trauès des montanhes e d’ua naua aufèrta toristica.

En aguest sens, er Ajuntament de Vielha e Mijaran a publicat es plecs de prescripcions tecniques particulares deth contracte entath dessenh de plataformes digitaus, cartografia, materiau promocionau e publicitari, ath delà deth subministrament dera senhalizacion.

Laguens des trabalhs que s’an d’amiar a tèrme i a: eth dessenh dera marca, es bases cartografiques, eth dessenh e fabricacion dera senhalizacion e pannèus informatius des circuits e des camins, eth dessenh de publicacion e impression de huelhetons e eth desvolopament de plataformes digitaus web e App mòbil tà qu’es usatgèrs gestionen es rotes descargades e poguen accedir a tota era informacion pendent era realizacion der itinerari e enregistrament cronometrat des rotes, en tot emplegar tecnologia de georeferenciacion.

Segontes eth dusau tinent d’alcalde e còsso d’espòrts e torisme, Alberto López, “Consideram qu’aguest projècte articularà ua aufèrta toristica damb un des principaus recorsi naturaus qu’auem, coma son es montanhes, en tot melhorar era sua metuda en valor e accessibilitat”.

Eth tèrme de presentacion d’aufèrtes per part des interessadi finalize eth pròplèu 2 de deseme e era durada deth contracte ei de 3 mesi des dera sua formalizacion. Per tant, se demore qu’aguesti trabalhs siguen prèsti entar inici dera pròplèu primauera.

Ena Sala d’Actes der estudi s’an visualizat es cuertmetratges e, posteriorament, era còsso d’Ensenhament e Cultura, Maria Vergés, amassa damb Edurne Pasaban, an liurat es distincions pes 19 projèctes presentadi

Eth jurat, entestat per Pasaban, a decidit premiar a toti es alumnes participaires, e s’an autrejat tres mencions especiaus, que seràn projectadi pendent era inauguracion des 2aus Jornades Europèes de Cinema de Montanha d’aguest dimenjada

 Aguesta tarde s’a amiat a tèrme ena Sala d’Actes dera Escòla Garona de Vielha, eth liurament des diplòmes as alumnes d’educacion primària qu’an participat en 2au Concors de Cuertmetratges “Vielha e Mijaran: Montanha e Cinema”, qu’ei includit laguens deth projècte Interreg POCTEFA “Reiaume der Aneto”. De prumèr enquia sisau, s’an visualizat un totau de 19 projèctes que s’an presentat en concors.

oznor

Cada classa a presentat eth sòn projècte. Era còsso d’Ensenhament e Cultura de Vielha e Mijaran, Maria Vergés, amassa damb era aupinista e directora dera Agéncia Kabi Travels, Edurne Pasaban, an estat es encargades de liurar aguestes distincions as participaires. Precisament, Pasaban, mairia des Jornades, a entestat eth jurat qu’a decidit autrejar un prèmi entà toti es alumnes dempús dera nauta participacion que i a agut. Un prèmi que consistís en un vrespalh entà toti es alumnes, entrades de teatre e materiau escolar.

Es cuertmetratges presentadi viren ath torn dera montanha e dera natura dera Val d’Aran: respècte ath miei ambient, bones practiques, activitats ena montanha… Era categoria escolara ei era grana nauetat d’aguest concors d’enguan. Es tres mencions especiaus se projectaràn ena Sala Era Audiovisuau de Vielha ena inauguracion des 2aus Jornades Europèes de Cinema de Montanha de Vielha e Mijaran d’aguesta dimenjada.

cof

“En nòm der Ajuntament, voi arregraïr a toti es alumnes dera Escòla Garona per auer participat en 2au Concors de Cuertmetratges deth municipi, en tot auer amiat a tèrme un gran trabalh damb es diuèrsi projèctes presentadi”, comente era còsso d’Ensenhament e Cultura, Maria Vergés. E hig qu’”aguest concors vò dar a conéisher eth potenciau naturau, socioculturau e esportiu deth municipi de Vielha e Mijaran en concrèt e dera Val d’Aran en generau, atau coma prebotjar eth respècte ath miei naturau, eth coneishement des montanhes araneses e es bones practiques enes espòrts que se desvolòpen ena natura”.

Es dies 9 e 10 de març, ath delà dera visualizacion des melhors  cuertmetratges  deth concors, tanben se poderà veir ua seleccion d’ua part des melhors cuertmetratges en airau de montanha que sigueren premiadi en Bilbao Mendi Film Festival en 2018.